अमेरिकन सायबर सिक्युरिटी कंपनी क्राऊडस्ट्राईकने काल एक मोठा झटका दिला, आणि आज त्याच कंपनीला जगाने झटका दिला. कंपनीच्या शेअरमध्ये 11 टक्क्यांहून अधिकची घसरण झाल्यामुळे गुंतवणूकदारांचे मोठे नुकसान झाले आहे.
क्राऊडस्ट्राईकच्या खराब सॉफ्टवेअर अपडेटमुळे जगभरात हाहाकार उडाला. अनेक कंपन्यांचे, विमान वाहतूक, आणि दैनंदिन व्यवहार ठप्प झाले. जवळपास 15 तास मायक्रोसॉफ्टचे सर्व्हर बंद होते, ज्यामुळे बँका, टीव्ही चॅनेल्स आणि शेअर बाजारावर विपरीत परिणाम झाला. काही ठिकाणी तर पूर्णपणे कार्य ठप्प झाले होते. सध्या परिस्थिती हळूहळू सुधारत आहे.
शेअर बाजारात मोठा फटका
क्राऊडस्ट्राईकच्या शेअरमध्ये 11 टक्क्यांहून अधिकची घसरण दिसून आली. कंपनीचे मार्केट कॅप 83 बिलियन डॉलरवरून 8.8 अब्ज डॉलरने घसरले, ज्यामुळे कंपनीला जवळपास 73 हजार कोटी रुपयांचे नुकसान झाले. कंपनी जगभरात सायबर सुरक्षा प्रदान करते आणि तिचे 30 हजारांहून अधिक मोठे ग्राहक आहेत.
गुंतवणूकदारांचा विश्वास डळमळीत
या घटनेमुळे ग्राहक आणि गुंतवणूकदारांचा कंपनीवरील विश्वास डळमळीत झाला आहे. क्राऊडस्ट्राईक सायबर सुरक्षेच्या क्षेत्रात लोकप्रिय होती आणि तिच्या शेअरने गेल्यावर्षी दुप्पट वाढ दाखवली होती. परंतु या अप्रिय घटनेमुळे कंपनीची बाजारातील प्रतिष्ठा घटली आहे आणि त्याचा परिणाम तिच्या शेअरवर झाला आहे.
पुढे काय?
वेडबश सिक्युरिटीजचे विश्लेषक डॅन इवेस यांच्या मते, क्राऊडस्ट्राईकला हा मोठा झटका आहे. तिच्या शेअरवर याचे परिणाम दिसून येतील. ही घटना तांत्रिक बिघाडामुळे घडली आहे. जर यंत्रणा हॅक झाली असेल तर ही चिंतेची बाब ठरू शकते. जेपी मॉर्गनच्या मते, सध्या ग्राहकांनी तात्कालीन प्रतिक्रिया नोंदवली आहे आणि थोड्याच दिवसात परिस्थिती पूर्वपदावर येईल. परंतु तोपर्यंत कंपनीचे आणि पर्यायाने गुंतवणूकदारांचे मोठे नुकसान झाले आहे.
