छत्रपती संभाजीनगर :
महाराष्ट्र विधानसभा निवडणुकीच्या पार्श्वभूमीवर राज्यभर नाट्यमय घटना घडत आहेत. 20 नोव्हेंबर 2024 रोजी होणाऱ्या मतदानाच्या एक दिवस आधी, छत्रपती संभाजीनगरमध्ये मतदान न करण्यासाठी पैसे वाटप झाल्याचा गंभीर प्रकार उघड झाला आहे.
घडला प्रकार
छत्रपती संभाजीनगरच्या पश्चिम विधानसभा मतदारसंघातील जवाहरनगर पोलिस हद्दीत काहींना मतदान न करण्यासाठी 1500 रुपये देण्यात आले, असा आरोप विरोधकांनी केला आहे. मतदारांच्या बोटांवर शाई लावून त्यांच्या मतदान आणि आधार कार्ड जमा केल्याची माहिती समोर आली आहे.
विरोधकांचा आरोप आणि कारवाईची मागणी
विधान परिषदेतील विरोधी पक्षनेते अंबादास दानवे यांनी या प्रकरणावर आवाज उठवला आहे. उद्धव ठाकरे गटाचे उमेदवार राजू शिंदे यांनी तात्काळ पोलिसांत तक्रार दाखल केली आणि निवडणूक आयोगाकडे कडक कारवाईची मागणी केली आहे.
अंबादास दानवे यांची सोशल मीडियावरील पोस्ट
दानवे यांनी सोशल मीडियावर आरोप करत सांगितले की, जवाहरनगर पोलिसांनी 18 लाख रुपयांची रक्कम जप्त केली होती, पण नंतर अंदाजे 2 कोटी रुपये काही राजकीय दबावाखाली सोडण्यात आले. शाईचा गैरवापर आणि निवडणूक यंत्रणेतील निष्काळजीपणाबाबत त्यांनी निवडणूक आयोगाने तातडीने खुलासा करावा आणि कठोर कारवाई करावी, अशी मागणी केली आहे.
निवडणुकीचे वातावरण तणावपूर्ण
मतदानाच्या एक दिवस आधी उघड झालेल्या या प्रकारामुळे निवडणूक प्रक्रिया प्रभावित होण्याची शक्यता व्यक्त केली जात आहे. निवडणूक आयोगाने या प्रकरणात तातडीने कारवाई करत निष्पक्ष निवडणूक सुनिश्चित करावी, अशी मागणी सर्व स्तरांतून होत आहे.
मतदानाचा हक्क बजावा, भ्रष्टाचाराला थारा देऊ नका!
Voter ID विसरलात? काळजी नको – या 12 ओळखपत्रांपैकी एक नेऊन तुमचा मतदानाचा हक्क बजावा!
