Sachin Tendulkar ODI Wickets :
‘क्रिकेटचा देव’ म्हणून प्रसिद्ध असलेला सचिन तेंडुलकर अनेकदा त्याच्या धावांमुळे चर्चेत असतो. तसेच, त्याची आंतरराष्ट्रीय क्रिकेटमधील 100 शतके लक्षात ठेवली जातात. सचिनला निवृत्त होऊन एक दशकाहून अधिक काळ लोटला, पण आजही त्याचे अनेक विक्रम मोडलेले नाहीत. सचिन केवळ बॅटनेच नाही तर गोलंदाजीतही चमत्कार केला आहे. याचा पुरावा म्हणजे एकदिवसीय क्रिकेटमध्ये जसप्रीत बुमराह, युझवेंद्र चहल आणि हार्दिक पांड्यासारख्या गोलंदाजांपेक्षा त्याच्या नावावर जास्त विकेट आहेत.
एकदिवसीय क्रिकेटमध्ये भारताकडून सर्वाधिक विकेट घेण्याचा विक्रम अनिल कुंबळेच्या नावावर आहे. कुंबळेने या फॉरमॅटमध्ये 334 विकेट घेतल्या आहेत. त्याच्याशिवाय फक्त जवागल श्रीनाथला वनडेत 300 विकेटचा टप्पा पार करता आला आहे. सचिन तेंडुलकरबद्दल बोलायचे झाले तर, त्याच्या नावावर 154 विकेट्स आहेत. मात्र जसप्रीत बुमराह लवकरच सचिनला मागे टाकू शकतो. एकदिवसीय क्रिकेटमध्ये बुमराहच्या नावावर 149 विकेट आहेत.
एकदिवसीय क्रिकेटमध्ये भारताकडून भुवनेश्वर कुमारने 141, इशांत शर्माने 115, युजवेंद्र चहलने 121, मुनाफ पटेलने 86, आरपी सिंगने 69 आणि रवी शास्त्रीने 129 विकेट घेतल्या आहेत. या सर्व दिग्गजांपेक्षा सचिन तेंडुलकर पुढे आहे. सचिनची वनडेतील सर्वोत्तम कामगिरी म्हणजे 32 धावांत 5 विकेट आहे.
सचिन तेंडुलकरचे हे 3 विक्रम मोडणे कठीण
सचिन तेंडुलकरने आंतरराष्ट्रीय क्रिकेटमध्ये सर्वाधिक 50 किंवा त्याहून अधिक धावा केल्या आहेत. तेंडुलकरने 264 वेळा 50 धावांचा टप्पा ओलांडला, ज्यात 100 शतके आणि 164 अर्धशतकांचा समावेश आहे.
सचिनने आंतरराष्ट्रीय क्रिकेटमध्ये 34,357 धावा केल्या आहेत. तो क्रिकेटच्या इतिहासात सर्वाधिक धावा करणारा खेळाडू आहे. सचिनचा हा विक्रम मोडणे जवळपास अशक्य आहे.
सर्वाधिक आंतरराष्ट्रीय सामने खेळण्याचा विक्रमही सचिन तेंडुलकरच्या नावावर आहे. त्याने आपल्या कारकिर्दीत 664 सामने खेळले. सध्या 500 आंतरराष्ट्रीय सामन्यांचा टप्पा पार करणारा विराट कोहली एकमेव फलंदाज आहे.
हेही वाचा: आशियाई हॉकी चॅम्पियन्स ट्रॉफी 2024: भारताचा दक्षिण कोरियावर विजय
