मुंबई: टी 20 वर्ल्ड कप जिंकवून देणाऱ्या भारतीय संघाचा भाग असलेल्या युझवेंद्र चहलला आता पुन्हा एकदा टीम इंडियात स्थान मिळाले नाही. आधी विराट कोहलीने त्याला संघातून बाहेर काढले होते आणि आता रोहित शर्मानेही त्याला संघात संधी दिली नाही. भारत विरुद्ध बांग्लादेश टी 20 मालिकेसाठी घोषित केलेल्या संघात चहलला स्थान न मिळाल्यामुळे त्याच्या करिअरवर पुन्हा एकदा ब्रेक लागल्याचे बोलले जात आहे.
बांग्लादेशविरुद्ध ऑक्टोबर महिन्यात होणाऱ्या तीन सामन्यांच्या टी 20 मालिकेसाठी 28 सप्टेंबर रोजी भारतीय संघाची घोषणा करण्यात आली. या संघात काही ज्येष्ठ खेळाडूंना विश्रांती देण्यात आली असून सूर्यकुमार यादवकडे कर्णधारपद देण्यात आले आहे. मात्र, चहलला संघात संधी न मिळाल्याने अनेक चाहते नाराज झाले आहेत.
विशेष म्हणजे, 2024 च्या टी 20 वर्ल्ड कपमध्ये भारतीय संघाचा भाग असलेल्या चहलला एकही सामना खेळण्याची संधी मिळाली नव्हती, आणि आता पुन्हा एकदा त्याला वगळण्यात आले आहे. दुसरीकडे, वरुण चक्रवर्तीला अडीच वर्षांनंतर संघात स्थान मिळाले आहे, ज्यामुळे चहलला संघात न घेतल्याचे कारण स्पष्ट होत नाही.
युझवेंद्र चहल सध्या चांगल्या फॉर्ममध्ये असून इंग्लंडमध्ये सुरू असलेल्या काउंटी चॅम्पियनशिपमध्ये त्याने नॉर्थम्प्टनशायरसाठी सलग दोन सामन्यांमध्ये 9-9 विकेट्स घेतल्या आहेत. आयपीएल 2024 आणि 2023 मध्येही त्याने उत्कृष्ट कामगिरी केली होती, त्यामुळे चहलला संघात न घेतल्याने चर्चा रंगली आहे.
