आशियाई हॉकी चॅम्पियन्स ट्रॉफीच्या दुसऱ्या उपांत्य सामन्यात भारताने दक्षिण कोरियाला 4-1 असे पराभूत करून अंतिम फेरीत प्रवेश केला. मंगळवारी भारताचा सामना यजमान चीनशी होणार आहे, जो पाकिस्तानला हरवून प्रथमच अंतिम फेरीत पोहोचला आहे.
भारताने सामन्याची आक्रमक सुरुवात केली आणि 13व्या मिनिटाला उत्तम सिंगने एक शानदार गोल करत भारताला 1-0 अशी आघाडी मिळवून दिली. दुसऱ्या क्वार्टरमध्ये 19व्या मिनिटाला भारतीय कर्णधार हरमनप्रीत सिंगने पेनल्टी कॉर्नरमधून गोल करून आघाडी 2-0 केली.
तिसऱ्या क्वार्टरमध्ये भारतीय संघाने जर्मनप्रीत सिंगच्या 32व्या मिनिटातील गोलाने 3-0 अशी आघाडी वाढवली. कोरियाने 33व्या मिनिटाला यांग जिहुनच्या गोलाने फरक कमी केला, पण भारताने 45व्या मिनिटाला दुसऱ्या पेनल्टी कॉर्नरवर हरमनप्रीत सिंगने गोल करून आघाडी 4-1 केली.
कोरियाने पुनरागमनाचा प्रयत्न केला, पण भारतीय संघाने शेवटपर्यंत मजबूत खेळ करून 4-1 असा विजय मिळवला आणि सलग दुसऱ्या वर्षी चॅम्पियन्स ट्रॉफीच्या अंतिम फेरीत प्रवेश केला.
